انا مش هسكوت .... الجزء الأول

كل واحد فينا ليه شخصية و كيان مختلف عن التاني و الشخصية و الكيان ده بيبنيه عدة عوامل .. زي التعليم و الثقافة و القراءة و البيئة و الأشخاص اللي بنتعامل معاهم و وو....
بس في الأخر كل واحد فينا هيكونلوا كيان و شخصية و تفكير مختلف عن التاني ... اما حاجة تانية متعلقة برضو بشخصية الأنسان زي التفكير و الطموح و حب الأستطلاع .. حاجات مهم جدا و بنكتسبها من القراءة و التعليم الكويس .. المشكلة اللي جي اعرضها انهارده مشكلة اساسها اختلاف التفكير .. بس عمر ما اختلاف التفكير ما كان مشكلة بالعكس لكن التفاوت الضخم بين الأذواق و العادات و التفكير كان مشكلة .. وبذات لما تكون في مجتمع كلوا بيتنافس على التطور و السبق الفكري و في ناس بتفكر تفكير رجعي و متخلف .. بمعنى انك تتمشى شوية في الشارع و اتفرج على مجتمعك المصري .. بس و انتا ماشي اتفرج علي الناس و فكر... ياترى شوفت ايه؟؟؟
هقولك ..
** شوفت شوية شباب بيعاكسوا بنت ( دان ماكنش راجل كبير في السن و بتحصل كتير) و انا بفسر نظرة الشاب للبنت اللي بيعكسها انها نظرة حيوانية ، دفعته غريزته العشواء الحيوانية للنظر للأنسانة اللي قدامه ع انها حيوان لأطفاء الغرئز .. وللاسف تقريبا كل نظرة الشباب للبنات نظرة حيوانية بحته ... و الشب اللي بيعاكس ده لو فكر شوية هيلقي نفسه حيوان و بيتصرف تصرف حيواني ...
**شوفت سوق ميكروباص مشغل اغنية (مع اعتذاري اني لقبتها بأغنية ) يقال عنها انها شعبي .. لا معنى و لا موسيقى و لا صوت .. و ان كان فيها معني بتقلب لمعاني انسان جاهل حيواني برضو يتخللها حاجات عجيبة زي " عيشتو حرام " و " شيشة" و " الست لما " .. مش عايز حد يجي يقولي اذواق .. لان ازاي اساسا اعتبرت ان قذورات زي دي ذوق .. ده جهل وملوش اي علاقة بالذوق ...
** مشيت شوية لقيت سينما و بوستر لفيلم سافل .. او تقعد تفتح التليفزيون تلقي الأفيش الفيلم كلو ايحاءات جنسية مستفذة .. وانا اذكر ان اخر علاقة بيني و بين التليفزيون كانت بسبب الأفيشات المنحطة للأفلام اللي نزلة في السوق .. و الأفلام اللي نزلة في السوق كلها يأما بتتكلم عن العشوائيات لمخرج مخبول عقليا مش هقول اسمه .. او للكبار فقط .. بمعنى ان الكبار مسمحلوهم يشوفوا الأفلام الزبالة فقط ... و قلما تلقي فيلم ينزل عدل غير فين و فين .... انا اذكر قول الدكتور مصطفى محمود - رحمه الله لما قال" ان الجامعة و البرلمان و السينما و المسارح و المكتبات .. لو صلح حالها دل ذلك على ارتقاء المجتمع " .. ده كده احنا مش في ارتقاء خالص للأسف ..
** تيجو نخش الجامعة .. يلا بينا ... مش هتكلم عن كليتي بما اني في طب بشري عين شمس لكن هتكلم عن المجمعات الاخرى للكليات اللي اصبحت جنائن للطلبة الفارغين .. انا عن نفسي بروح اقعد في الجامعة لما بفضى .. اكمنها جنينة ........
مش هتكلم برضو في النقطة دي ... انا عايزك تيجي تقعد معايا عند الشلة اللي هناك دي ... قشطة .. القعدة حلوه و لذيذة هزار و اغاني وو مش دي القضية .. تعالى تنكلم جد شوية .. هتلقي الحوار كله قلب هزار .. وحتى لو جيت قلتلو صلي ع النبي هيقلبها هزار .. ع فكره دي شلة صبيان بس .. بالك لو فيها بنات ..... كل واحد لازم يكون المهرج الأكبر عشان يكسب اعجاب الجمهير .. حتى لو على حساب انو يجرح شخص او يقطع صحبية اتنين او حتى حب ... مشكلتنا يا شباب هي حب الظهور اللي بيخلينا نفقد احترمنا لبعضنا .. انا مثلا من الأشخاص اللي بكره جدا الظهور .. و اللي بيحاول يظهلر على حسابي بقولوا اتفضل و بسمحلوا .. المشكلة ان في ناس اعتبرت اني ضعيف الشخصية من كده .. اللي عايز اوضحوا ان عمر حب الظهور عن طريق انك تبقى مهرج الجروب او الشلة ماكنش شئ كويس ابدا .. و ناس كتير جذبت ناس اكتر بالجدية المصحوبة بهزار ميقللش من احترام حد تاني .........
سيبك انتا من ده كمان انتا تطلع ع كليتي .. كلية الطب .. و اللي بيقولوا عليها كلية الناس المعقدين و انا اولهم .. اتكلم مع واحد فيهم ... مش هتلاقي في اي ثقافة ابدا و بذات البنات اللي كل تفكيرهم اذاكر و بس مش عارفه حتى هيا بتذاكر ليه و اتحدى واحدة فيهم تعرف هيا هتتخصص امتى .. دي كلية الطب .. بالك بالبقي .؟؟!!!!
طالب جامعي ده لقب كبير جدا يا شباب .. مش بالمذاكرة بس بكل حاجة .. دي المرحلة اللي انتا بتكون فيها كيلنك و تفكيرك و على اساسه ممكن تعمل حاجة لبلدك ( بلاش بلدك .. لنفسك) اقرأ في كتب للناس الكبار ... فكر مع د/ مصطفى محمود ، انيس منصور ، د/ احمد خالد توفيق و اضحك شوية مع بلال فضل و ابكي مع روايات يوسف السباعي ... انا فاكر اني كان عندي منافشة بحث في قسم السيكولوجي عندنا في المستشفي و كنت قاعد بقرأ كتاب للدكتور مصطفى محمود .. ف جيه واحد من اللي معايا في البحث قلي انتا بتقرى اية .. انتا فاضي يا بني .. روح اقرالك الكتب اللي عليك افيدلك ....... ادي طالب جامعي حصر تفكيروا في المذاكرة .. اهو احسن من غيروا بتوع الملزم ليلة الأمتحان في الكليات التانية ..... كان السؤال اللي شاغل تفكيري و انا صغير .. هو ليه كل الناس مش كويسة زي بعض ؟ ليه في اللي بيسمع اغاني و اذواق زفت و اللي بيسمع لبتهوفن و الموسيقى الكلاسكية .. ليه الناس كلها مش بتحب تبقى احسن.. بحجة انهم مش فاضيين .. ؟؟؟
** طلعنا من الجامعة و هنركب المترو عشان نروح .. الله اية الجمال ده عمليين ابواب للطلوع و النزول و عليها لوح توضح ان ده للطلوع و ده للنزول كبيرة تخزق عين اي واحد .. وقف المترو .. الله الناس داخلة و طالعة عادي و تتحرق النظام عللى اللبينظموا ... و تيجي تقول لواحد ان ده باب الصعود .. يقولك ماكولوا بينزل من هنا ... و التاني يقولك دي عالم متخلفة عايزين يتحكموا فين ...... الله عليكي يا مصر يا بلدي .... شعبك السكر المفكر الجميل .. اللي خدعووا و قالوا انوا اذكى شعوب الأرض .......و انا شايف انوا اغبى مخلوقات الله .........
** جينا قعدنا في القهوة اللي قدام بيتنا .. و طلبنا اتنين كركاديه ..( انا عارف انك مش بتحب الكركاديه بس اشرب معايا ) جيه اعلان عن الأنجاب و الصحة الأنجابية .. و تلقي شخص يعلق على الأعلان و يقول .. هم مش عايزنا نخلف و لا نام مع نسوانا اما حكومة و سخة .. والله انتا اللي دماغك و سخة .. يعني يا افندي يا محترم لما سيادتك تجيب 6 عيال و انا جبت 6 عيال ع اسبوع هنبقي 200 مليون و الموارد اساسا مش مستحملة الموجود .. بس هو بس زعلان من الحكومة (اصل لو قللتلو الحكومة جيب ستة هيقول دول عايزين يموتونا من كتر الخلفة ) اكمن المفتش دخل ملقهوش ع مكتبة عملوا خصم يوم من المرتب .. الشمعة الكبيرة اللي بنعلق عليها مشكلنا .. الحكومة ........
للأسف انا كلامي كتير و شايل اكتر و وطولت عليكوا بس لينا تكملة في الجزء التاني ان شاء الله .. استنوني فيه ...

كتبها لكم ........ احمد اشرف
طب عين شمس